* Mámoa inédita en Negueira de Muñiz

O día 5 de agosto de 2017, integrantes do Colectivo Patrimonio dos Ancares localizamos unha mámoa non catalogada no Carballín, na parroquia de Ouviaño (Negueira de Muñiz), situada a uns 1.000 metros de altitude, e a pouco máis de 100 metros do límite con Asturias. O túmulo mide 11 metros de diámetro e ten unha altura de 0,50 metros. Apréciase un cráter de violación con pouca profundidade. Sobre a mámoa vense restos de pequenas pedras que formarían parte da coiraza pétrea que recubría o túmulo. Os traballos agrícolas que antano se efectuaron sobre o xacemento afectaron á masa tumular, o que non impide afirmar que se atopa en relativo bo estado de conservación.

Ata o momento, no concello de Negueira de Muñiz son escasos os xacementos prehistóricos. Do Neolítico temos unha mámoa entre Foxo e Vilauxín, na parroquia de Barcela, moi estragada e de acceso complicado, e esta que vimos de documentar.

O achado foi posto en coñecemento do Servizo de Patrimonio da Xunta e o Concello de Negueira de Muñiz.